Rrjedh plani i zbatimit të Marrëveshjes Bazë: 15 ditë pas nënshkrimit, paraqitet drafti për Asociacionin

Mediumi kosovar Dukagjini ka prezantuar planin e zbatimit të marrëveshjes bazë, për të cilin foli dje edhe kryeministri Albin Kurti. 

Sipas këtij mediumi kosovar ky tekst përmban plot nëntë nene, ku parashihet edhe themelimi i Asociacionit të Komunave me Shumicë Serbe. 

“Aty parashihet që jo më vonë se 15 ditë pasi palët të nënshkruajnë marrëveshjen bazë, ekipi menaxhues duhet të paraqesë draftin për themelimin e Asociacionit të Komunave me shumicë serbe. Një gjë e tillë do të mundësojë që palët të lëvizin drejt hapave të tjerë, siç është njohja reciproke e dokumenteve.” – shkruan ky medium në një artikull të publikuar së fundi. 

Aty janë të përfshira edhe pikat e mediatizuara më herët nga plani franko-gjerman, pjesë e të cilës është ky plan zbatimi. 

Pra, kjo nënkupton se Kurti do të ketë vetëm 15 ditë kohë për të paraqitur draftin e parë të statusit për Asociacionin. 

Një tjetër pikë në fund premton një konferencë të nivelit të lartë për investime dhe mbështetje financiare në Kosovë dhe Serbi. 

Po ashtu, brenda një afati kohor prej 30 ditësh parashihet që të themelohet një Komitet i përbashkët për monitorimin e zbatimit të marrëveshjes, i kryesuar nga Bashkimi Evropian. 

Por, një pikë problematike është edhe zyrtarizimi i statusit të Kishës Ortodokse Serbe që parashihet të ndodh në një afat vetëm 30 ditor pas themelimit të Komitetit të Përbashkët. 

Pikat: 

Shtojcë e Marrëveshjes për rrugën drejt normalizimit të marrëdhënieve ndërmjet Kosovës dhe Serbisë

Udhërrëfyesi i Zbatimit

Kjo shtojcë përbën një pjesë integrale të Marrëveshjes.

Kjo Shtojcë përshkruan sekuencën e ngjarjeve për zbatimin e Marrëveshjes.

Këto rrjedhin nga detyrimet e Palëve të përmendura në nenet 1, 4, 7, 8, 9 dhe 10 të Marrëveshjes. Të gjitha nenet e tjera do të hyjnë në fuqi me nënshkrimin e Marrëveshjes.

Jo më vonë se 15 ditë pas nënshkrimit të Marrëveshjes bazë, Ekipi Menaxhues do të mblidhet për të paraqitur draftin e parë të Statutit për të siguruar një nivel të duhur të vetë-menaxhimit për komunitetin serb në Kosovë në Dialogun e lehtësuar nga BE-ja, pas së cilës Palët do të fillojnë menjëherë negociatat për Statutin nën lehtësimin e BE-së.

Me paraqitjen e draftit të parë të Statutit dhe fillimin e negociatave për të, palët do të mundësojnë zyrtarisht hyrjen në fuqi menjëherë si vijon:

a) Njohja reciproke e dokumenteve të tyre përkatëse dhe simboleve kombëtare (neni 1 (2) i Marrëveshjes)}; dhe

b) Shkëmbimi i misioneve të përhershme në bazë të një marrëveshjeje paraprake mbi marrëveshjet praktike (neni 8 i Marrëveshjes)

Palët angazhohen të finalizojnë negociatat dhe të bien dakord për statutin në një afat kohor të përshpejtuar, por jo më vonë se afati i përmendur në nenin 8 të kësaj shtojce.

Kosova zotohet të sigurojë qëndrueshmërinë ligjore të statutit të rënë dakord dhe e miraton atë duke miratuar një dekret.

Brenda 30 ditëve pas nënshkrimit të Marrëveshjes, palët do të krijojnë një Komitet të Përbashkët për të monitoruar zbatimin e Marrëveshjes, të kryesuar nga BE-ja (neni 10 (1) i Marrëveshjes) dhe do të bien dakord për Termat e Referencës së Komitetit.

Brenda 30 ditëve pas themelimit të Komitetit të Përbashkët, Kosova do të zyrtarizojë statusin e Kishës Ortodokse Serbe në Kosovë dhe do të fillojë procedurat e brendshme për mbrojtjen e objekteve të trashëgimisë fetare dhe kulturore serbe sipas Dialogut të lehtësuar nga BE-ja (neni 7 (2) të Marrëveshjes).

Brenda 150 ditëve pas nënshkrimit të Marrëveshjes, BE-ja së bashku me donatorët e tjerë do të organizojë një konferencë të nivelit të lartë për të miratuar një paketë speciale për investime dhe mbështetje financiare, ( Neni (9) i Marrëveshjes).

Asnjë disbursim nga paketa nuk do të bëhet përpara se Lehtësuesi i BE-së të arrijë në përfundimin se të gjitha dispozitat e kësaj shtojce dhe nenit 4 të marrëveshjes bazë janë zbatuar plotësisht.