Qytetet evropiane që ia vlen të eksplorohen me biçikletë

Pranvera është koha ideale për të ndjerë atmosferën e vërtetë të një qyteti me biçikletën tuaj. Megjithatë, jo të gjitha qytetet janë të përshtatshme për të ngarë biçikletën.

Nëse po planifikoni një udhëtim jashtë vendit dhe çiklizmi është mjeti i preferuar i transportit për ju, mund të merrni frymëzim nga sugjerimet e mëposhtme.

Antwerp, Belgjikë

“Biçikleta është një mënyrë e mirë për të vizituar një destinacion të ri, ose për të rizbuluar një vend dhe për ta njohur më thellë”. Antwerp renditet në vendin e tretë në Indeksin më të fundit Botëror të Qyteteve të Biçikletave (Global Bicycle Cities Index).

Ai ofron një ndërthurje të monumenteve historike, arkitekturës moderne, muzeve të klasit botëror, si dhe dyqaneve dhe restoranteve më të mira në Europë. Përveç kësaj, është një qytet relativisht “miqësor” me biçikletat, i rrethuar me shumë gjelbërim.

Bernë, Zvicër

Rruga e qytetit të Bernës ju çon nëpër lagje të tilla si Kirchenfeld (distrikti i muzeut). Është 15 kilometra, me një ndryshim prej rreth 200 metrash lartësi përgjatë rrugës. Itinerari i turneut të UNESCO-s fillon në qytetin e vjetër të Bernës dhe të çon në Kopshtin e Trëndafilave, një vend i njohur për fotografi me një pamje që lë pa frymë.

Ai gjithashtu kalon pranë Katedrales së Bernës dhe malit të qytetit, Gurten, përpara se të vijojë në mjedise më rurale.

Kopenhagë, Danimarkë

Afërsisht 70% e danezëve kanë biçikleta, sipas Qendrës Daneze të Njohurive të Çiklizmit, dhe rreth 45% e udhëtimeve në zonën e Kopenhagës janë me biçikletë. Korsia e parë e biçikletave në Danimarkë u krijua në 1892 në Kopenhagë.

Sot, kryeqyteti ka 385 kilometra korsi biçikletash dhe falë inovacioneve daneze të urbanistikës, si rrugët e ngushta dhe sipërfaqet me reliev, makinat ngasin më ngadalë.

Lajpcig, Gjermani

Qytete të shumta gjermane renditen më së miri në Indeksin Global të Qyteteve të Biçikletave dhe një prej tyre është qyteti i vjetër kulturor Lajpcig. Afërsisht 185 kilometra në jugperëndim të Berlinit, Lajpcig ishte shtëpia e kompozitorit barok Johann Sebastian Bach.

Në vitin 1990, Lajpcig kishte 70 kilometra korsi biçikletash. Sot, sipas qeverisë së qytetit, ka më shumë se 400 kilometra. Çiklizmi në përgjithësi lejohet në hapësirat e gjelbra dhe në parqet e qytetit.

Strasburg, Francë

Qytete të shumta gjermane vlerësohen mirë për kulturën e tyre të çiklizmit, kështu që ndoshta nuk është çudi që “Kryeqyteti francez i çiklizmit” është qyteti i Strasburgut, i cili ndodhet pikërisht përtej lumit Rhine nga Gjermania. Me një popullsi mbi 480,000 banorë, Strasburgu ka rreth 600 kilometra korsi biçikletash, sipas Zyrës së Turizmit të Strasburgut. Rreth 16% e të punësuarve përdorin biçikleta për të shkuar në punë.

Të paktën 6,000 biçikleta janë në dispozicion në stacionet e vetë-shërbimit 24/7. Vélhop është shërbimi kryesor i biçikletave me qira në qytet, duke ofruar biçikleta për të rritur, biçikleta për fëmijë, biçikleta tandem, dhe biçikleta elektronike.