Kryetari i Partisë Demokratike të Kosovës (PDK), Memli Krasniqi, ka qëndruar të mërkurën në Prizren, ku ka takuar fëmijët e lindur në vitin 2008, me të cilët ka bashkëbiseduar për rrugëtimin e deritanishëm të shtetit të Kosovës.

Krasniqi, përmes një postimi në “Facebook” është shprehur i kënaqur që ka ndarë me ta emocionet e ditës së shpalljes së Pavarësisë.

 “Ishte kënaqësi të ndaj me ta emocionet e papërsëritshme të asaj dite, si një ndër nënshkruesit e Deklaratës së Pavarësisë së Kosovës. Ishte ëndërr e realizuar. Ëndrrat e tyre më treguan edhe ata, përmes disa punimeve të jashtëzakonshme: Kosova si një vend i zhvilluar dhe mundësi më të mëdha për të rinjtë, Kosova pjesëmarrëse në kampionatin botëror të futbollit dhe me suksese të tjera në sport, Kosova në BE dhe në NATO – ishin disa prej ëndrrave të tyre”, ka shkruar Krasniqi.

Më tutje, lideri i PDK-së e ka konsideruar fatkeqësi që aktualisht rinia e vendit po e sheh realizimin e ëndrrave të tyre në shtete tjera.

 “Është fatkeqësi situata me të cilën po ballafaqohemi aktualisht, ku rinia jonë po e sheh realizimin e ëndrrave të tyre në shtete tjera. Ëndrrat e të rinjve tanë duhet të jenë prioriteti dhe frymëzimi ynë i përditshëm, që bashkë të nisim një etapë të re të zhvillimit të shtetit tonë, që ato ëndrra të realizohen këtu,  në Kosovën tonë. Krahas zotimit se do të jem mbështetësi më i madh i ëndrrave që ata kanë – atyre u kërkova vetëm një gjë: Besoni në një të ardhme më të mirë – Besoni në Kosovë”, ka shkruar Krasniqi.