Dy të dyshuar për kurdisje të ndeshjeve, dy të tjerët klubet ‘buzë greminës’: Kush u takua me përfaqësuesit e UEFA’s dhe FIFA’s?

Saga e licencimit të Federatës së Futbollit të Kosovës nga Ministria e Sportit, dyshimet për korrupsion të kryetarit Agim Ademi, detyruan zyrtarë të lartë të UEFA’s dhe FIFA’s për të ardhur në Kosovë për një vizitë të jashtëzakonshme. Megjithatë, ata u pritën në objektin e FFK’së nga persona që dyshohen për kurdisje të ndeshjeve e të tjerë që klubet e tyre nuk janë në gjendje aspak të mirë, shkruan Gazeta Metro.

Siç dihet, javë më parë lajmi i dy gazetave prestigjioze në Francë ‘Le Figaro’ dhe ‘Le Parisien’ se klubi i Llapit po dyshohet për kurdisje të ndeshjeve kishte shokuar opinionin kosovar.

Kjo skuadër udhëhiqet nga trajneri Tahir Batatina, i cili qëndronte pranë ushtruesit të detyrës së sekretarit të FFK’së, Taulant Hodaj në takimin me zyrtarët e UEFA’s dhe FIFA’s.

Për dyshimet për kurdisje të ndeshjeve nga Llapi, në Francë thuhet se janë arrestuar nëntë persona, ndërsa edhe Prokuroria Themelore në Prishtinë ka nisur hetimet.

I pranishëm në këtë takim shumë të rëndësishëm ishte edhe Avni Haxhiu, presidenti i Trepçës.

Vite më parë klubi nga Mitrovica ishte përfshirë në kurdisje të ndeshjes me Fushë-Kosovën ku edhe kishte ngritje të aktakuzës për disa nga zyrtarët e Trepçës.

Gjithashtu, duhet kujtuar se skuadra nga Mitrovica nuk është në gjendje aspak të mirë. Dikur kampioni i Kosovës gjendet në pozitën e tetë në tabelë në Ligën e Parë (Grupi A).

Gjendjen aspak më të mirë në aspektin e rezultateve nuk e kanë as dy të tjerët që u takuan sot me delegacionin e përbashkët të UEFA’s dhe FIFA’s. Fjala është për presidentin e 2 Korrikut, Shaban Baholli dhe atë të Vllaznisë së Pozheranit, Shpend Musa.

Të dyja klubet po luftojnë për mbijetesë në Ligën e Parë (Grupi B), ku me pikë të njëjta nga 17 ndajnë së bashku vendin e tetë dhe nëntë. Vetëm tre pikë më pak ka Arbëria që renditet e fundit.

Të lartcekurit duket se më shumë interes kanë të ‘mbrojnë’ FFK’në para zyrtarëve të UEFA’s dhe FIFA’s, sesa të gjejnë një rrugë zgjidhje për të shpëtuar sezonin.

I fundit, por jo edhe më pak i rëndësishmi është edhe vetë ushtruesi i detyrës së sekretarit Taulant Hodaj.

Një grup ‘opozitar’ i FFK’së vazhdimisht e akuzon atë se po e kryen paligjshëm detyrën e sekretarit gjeneral të FFK’së duke qenë avokat nga Oda e Avokatëve të Kosovës dhe aksionarë në zyrën e avokatisë ‘Hodaj & Partners’.

Ata thirren në nenin 10 dhe 39 të ligjit të avokatisë dhe sipas tyre një avokat siç është Hodaj nuk mund t’i ushtrojë njëkohësisht të dy këto funksione.

Në anën tjetër, në njoftimin e FFK’së për këtë takim nuk është cekur fare që kryetari Agim Ademi është në arrest shtëpiak nën dyshimin për korrupsion në shtëpinë e futbollit kosovar.

Gjatë kësaj kohe janë marrë në pyetje edhe zyrtarë të lartë të FFK’së nga Drejtoria për Hetimin e Krimeve Ekonomike dhe Korrupsionit në Policinë e Kosovës.

Ata janë intervistuar katër persona nën dyshimet për zhvatje, respektivisht keqpërdorim në pasurinë dhe interesat e FFK’së. Të gjitha këto në njoftimin e FFK’së janë munduar t’i qasen vetëm me ”zhvillimet e fundit rreth FFK-së”.

”Delegacioni fillimisht u takua me nënkryetarin Bakir Burri dhe sekretarin e përgjithshëm, Taulant Hodaj, derisa më pas zhvilluan një takim të përbashkët edhe me përfaqësuesit e klubeve, për të diskutuar shqetësimet e këtyre të fundit në lidhje me procesin e licencimit dhe vështirësitë që po i hasin gjatë këtij procesi.”

”Përfaqësuesit e UEFA-s dhe FIFA-s i dëgjuan me vëmendje të gjitha shqetësimet e ngritura nga përfaqësuesit e klubeve, premtuan se do t’i adresojnë ato në organet kompetente dhe me angazhimin e përbashkët të të gjitha palëve shumë shpejt mund të ketë rezultate pozitive në këtë drejtim. Më pas delegacioni i UEFA-s dhe FIFA-s i vazhdoi takimet me akterët tjerë të sportit në Kosovë, po ashtu, në frymën e bashkëpunimit dhe konstruktivitetit,” shkruan ndër të tjerash FFK.

Kujtojmë se delegacioni i përbashkët i UEFA’s dhe FIFA’s ishte i përbërë nga persona shumë të rëndësishëm si Servet Yardimci, anëtar i Komitetit Ekzekutiv të UEFA’s dhe kryetar i Komitetit të UEFA’s për Federatat Kombëtare, Luca Nicola, kryesues i Qeverisjes Kombëtare dhe Institucioneve Globale të UEFA’s dhe Sofia Malizia, menaxhere e qeverisjes së federatave anëtare të FIFA’s.

Të njëjtit thuhet se janë takuar edhe me zyrtarë të Ministrisë së Sportit dhe ministrin Hajrulla Çeku. /gazetametro.net