Vendimi i ndikuar politikisht/ Alibeaj: Celibashi e ka të pamundur të ndajë opinionet dhe tifozerinë personale nga faktet juridike

Enkelejd Alibeaj ka reaguar pas vendimmarjes së KQZ-së në lidhje me pjesëmarrjen e PD-së në zgjedhje. 

Ai është shprehur që vendimi i marrë nga Komisioneri i Zgjedhjeve është i ndikuar politikisht me qëllim që të zgjasë regjistrimin e PD-së në zgjedhje.

Çdo iniciativë aspak ligjore që niset për të penguar rrugën e PD-së, nuk do të jetë efektive sipas tij.

Postimi i plotë:

Vendimi i paralajmëruar i Komisionerit të Zgjedhjeve është qartas i ndikuar politikisht nga aktorët politikë të interesuar që PD të mos regjistrohet në procesin e zgjedhjeve vendore të 14 majit. Sikundër e deklaroi dhe publikisht, zoti Celibashi e ka të pamundur të ndajë opinionet dhe tifozerinë personale nga faktet juridike. Për pasojë, vendimi i tij e zgjat pa fund dhe pa arsye të qenësishme regjistrimin e PD. Dukshëm, e madje deri në kufijtë e groteskut, komisioneri nisur vetëm për shërbim politik ndaj kundërshtarëve të PD, vendos ta përjashtojë nga zgjedhjet. Siç ndodhte këtu e 32 vjet më parë, kur ishte partia në pushtet ajo që lejonte ne zgjedhje vetëm satelitët e saj. Kjo marrëzi politike, si 32 vjet më parë, i ndodh sot Shqipërisë kur është vend i NATO-s dhe synon të jetë anëtar i BE-së! Megjithëkëtë e si përherë do të vijojmë rrugën ligjore për të finalizuar përfaqësimin e PD në 14 maj. Çdo artificë ligjore apo arsye e stisur politike dhe aspak ligjore është thjesht rruga e dëshpëruar që zgjatime të politikës së vjetër në institucione kushtetuese të pavarura kanë zgjedhur për të na penguar në rrugën tonë. Nuk do ia dalin!!