Njeriu i LVV-së Baton Kelmendi  kritika të ashpra Arben Vitisë, akuzon MSH-në për blerjen e infuzionit të prodhuar në Serbi

Njëri prej kuadrove kryesore të Lëvizjes Vetëvendosje për shëndetësinë, Baton Kelmendi, ka hedhur kritika të ashpra në drejtim të bashkëpartiakut të tij, ministrit Arben Vitia.

Kelmendi e ka akuzuar Ministrinë e Shëndetësisë se ka blerë infuzione të prodhuara në Serbi, shkruan Demokracia.com.

Njeriu, i cili në të kaluarën ishte përfolur edhe për Ministër të Shëndetësisë nga ana e LVV-së, përmes një postimi në Facebook ka thënë se tenderin për furnizim e ka fituar kompania me seli në Serbi.

“Viti 2023, pacientët në Kosovë në Institucione shëndetësore publike trajtohen me infuzione të prodhuara në Serbi nga Hemofarmi i Vërshacit”, ka shkruar ai.

Kelmendi tutje ka ironizuar duke thënë se “Pragu për disa është “Pllazma keksat mos i hani”.

Demokracia.com në shkurt të këtij viti kishte raportuar se Ministria e Shëndetësisë kishte blerë infuzione të prodhuara në Serbi.

Ndryshe, bashkëshortja e Kelmendit, Alma, ishte punësuar në Qendrën Klinike dhe Universitare të Kosovës në dhjetor të vitit të kaluar.

Postimi i plotë i Kelmendit:

Viti 2023, pacientët në Kosovë në Institucione shëndetësore publike trajtohen me infuzione të prodhuara në Serbi nga Hemofarmi i Vërshacit.

Shkurt e shqip tenderin për furnizim e ka fituar kompania me seli në Serbi!

Pragu për disa është “Pllazma keksat mos i hani”! /Demokracia.com/