‘Ka njohje’, Ramush Haradinaj vazhdon ta mbështesë propozimin evropian

Kreu i AAK-së, Ramush Haradinaj, vazhdon ta mbështesë propozimin evropian duke qenë i bindur se aty përfshihet edhe njohja e Kosovës ani pse një gjë e tillë nuk thuhet në mënyrë eksplicite.

“Besoj se pasi ka dakordim për planin, për aneksin për implementim është në përfundim puna. Pra, pritet që në ditët që vijnë shumë shpejt të arrihet dakordimi për aneksin për implementim,” – u shpreh lideri i partisë së tretë opozitare.

Haradinaj shprehu shqetësim edhe në lidhje me zgjedhjet e parakohshme lokale në katër komunat me shumicë serbe në veri të vendit, që ishin shtyrë nga dhjetori për në prill.

“Me rëndësi për Kosovën është që të fitohet në kohë për shkak se nëse marrëveshja arrihet gjatë këtij muaji atëherë do të mund t’i mbajmë zgjedhjet e rregullta në veri, ashtu siç ishte paraparë,”

Ai në lidhje me njohjen i tha këto fjalë:

“… e ka njohjen marrëveshja, e ka njohjen në planin ndërkombëtar. Pra, Serbia e njeh Pavarësinë e Kosovës, të drejtat si shtet i pavarur, i barabartë në bazë të kartës së OKB-së në planin ndërkombëtar,” – shtoi ai.

AAK është partia e vetme opozitare që e mbështet Propozimin Evropian, tash për tash.