Specialja publikon emra që pretendohet se janë vrarë e zhdukur

Zyra e Prokurorit të Specializuar ka dorëzuar një version më pak të redaktuar të aktakuzës së ndryshuar në çështjen ndaj Hashim Thaçit, Kadri Veselit, Jakup Krasniqit dhe Rexhep Selimit.

Në këtë version bëhen të ditur emrat e disa prej viktimave që pretendohet se janë vrarë dhe disa të tjerëve që pretendohet se janë zhdukur me forcë. Lidhur me publikimin e emrave të viktimave ka reaguar ushtruesi i detyrës së kryetarit të OVL-UÇK-së, Faton Klinaku,i cili e ka quajtur skandal të radhës të Speciales. Klinaku ka thënë se Gjykata Speciale për herë të dytë ka rrezikuar dëshmitarët.

“Skandali tjetër dhe poshtërsia e radhës nga Gjykata Speciale, përkatësisht Pseudo Zyra e Prokurorit të Specializuar: I publikon emrat e viktimave që kinse i kanë kryer krerët e UÇK-së, e kjo bëhet para se të filloj procesi gjyqësor”, ka shkruar Klinaku në rrjetin social Facebook.

Ai, më tej shtoi se me këtë, për herë të dytë, por edhe më shumë i rrezikojnë dëshmitarët, sepse herën e parë i kanë rrezikuar kur ju ndodhi skandali i rrjedhjes së dosjeve nga zyrat e tyre në Hagë dhe për fajin e tyre mbahen peng qe dy vite e gjysmë krerët e OVL UÇK-së Hysni Gucati e Nasim Haradinaj.

 Ndërkohë, aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020.