Trajneri Petrescu jep sinjal për largimin e Krasniqit

Trajneri i Clujit të Rumanisë, Dan Petrescu, ka përgëzuar lojtarët e tij në barazimin pa gola me Lazion, pavarësisht se skuadra e madhe rumune u eliminua nga Liga e Konferencës.

Petrescu ka veçuar paraqitjen e Krasniqit, ndërsa ka dhënë sinjale se ai mund të largohet që në afatin kalimtar të verës.

Ai ka thënë se Krasniqi, që iu bashkua Clujit në janar nga Ballkani i Suharekës, është lojtar i nivelit krejtësisht tjetër në krahasim me bashkëlojtarët e tij.

Ai thotë se ndoshta nuk do të mund të punojë shumë gjatë me të, pasi ai mund të largohet marrë parasysh zhvillimin e hovshëm.

“Krasniqi është lojtar shumë i mirë. Ai është në një nivel tjetër. Nuk mendoj se na ka mbetur edhe shumë kohë për ta stërvitur atë, sepse brenda 2-3 muajsh, ai mund të largohet. Nëse do të shënonte sot, ai do të largohej sot. Lazio e pati Ciro Immobilen, dhe kjo është e thjeshtë!. Krasniqi mund të luajë kudo, në çfarëdo ekipi, pa ndonjë problem. Nëse do ta kishim stadiumin plot si sot me atmosferë të tillë, do të ishim të frikshëm. Kur luan me Lazion, të gjithë lojtarët e tejkalojnë veten. Do të jetë shumë e vështirë ta përsëritim një ndeshje të tillë në kampionat”, ka theksuar Dan Petrescu pas ndeshjes, shkruan “fanatik.ro”.